ពោតបារាំង ឬ Okra  មានដើមកំណើតនៅអាហ្វ្រិកខាងលិច ក្នុងប្រទេសស៊ូដង់ ជារុក្ខជាតិប្រចាំរដូវមានអាយុប្រហែល១ឆ្នាំ មានកំពស់ប្រហែល 0.5 – 2.5 ម៉ែត្រ ដើមនិងមែកមានពណ៌បៃតង ប៉ុន្តែពេលខ្លះក៏មានចំណុចពណ៌ស្វាយ។ នៅតាមដើមមានរោមគ្របដណ្តប់ពាសពេរញ ដូចគ្នាស្លឹកនិងផ្លែផងដែរ លូតលាស់ល្អនៅក្នុងតំបន់មានអាកាសធាតុក្តៅសើម ឬមានសីតុណ្ហភាពចន្លោះពី ១៨ដល់៣៥ អង្សាសេ។ បន្តពូជដោយវិធី  បណ្តុះគ្រាប់។

ពោតបារាំង​សម្បូរសាធាតុចិញ្ចឹមយ៉ាងច្រើនសន្ធឹកសន្ធាប់ ដូចជា កាកសរសៃ វីតាមីន A វីតាមីន C និងសារធាតុរ៉ែសំខាន់ៗរួមមាន  ជាតិដែក  ប៉ូតាស្យូម និង​ម៉ាញ៉េស្យូម​ជាដើម។

​​សព្វគុណផ្នែកឳសថនៃដើមពោតបារាំង ឬ Okra 

១. ផ្លែពោតបារាំងមានផ្ទុកហ្វៃប៊័រឬកាកសរសៃអាហារច្រើន ជួយគ្រប់គ្រងកម្រិតជាតិស្ករក្នុងឈាមឲ្យមានស្ថេរភាព ជួយរក្សាកម្រិតការបឺតស្រូបជាតិស្ករពីពោះវៀនធំឲ្យមានលំនឹង។ ម្លោះហើយ ពោតបារាំង ឬ Okra គឺជាបន្លែដ៏ល្អសម្រាប់អ្នកមានជំងឺទឹកនោមផ្អែម។

២. ផ្លែប្រើជាថ្នាំបំប៉នខួរក្បាល។

៣. ផ្លែជួយព្យាបាលជំងឺលើសឈាម រក្សាសម្ពាធឈាមឲ្យនៅធម្មតា ជួយការពារសរសៃឈាមត្បៀត។ ។

៤. ផ្លែពោតបារាំង ជួយកម្ចាត់ជាតិពុលចេញពីរាងកាយនិងបញ្ចុះកូឡេស្តេរ៉ូល។​កាកសរសៃនៅក្នុងផ្លែពោតបារាំង​ ជួយកាត់បន្ថយកម្រិតកូឡេស្តេរ៉ូលបាន។

៥.កាកសរសៃនៅក្នុងផ្លែពោតបារាំង ជួយកម្ចាត់ជាតិខ្លាញ់ខ្ពស់នៅក្នុងថង់ទឹកប្រមាត់ ជួយកាត់បន្ថយជាតិខ្លាញ់និងកូលេស្តេរ៉ូលបាន ស្រដៀងនឹងការប្រើថ្នាំបញ្ចុះជាតិខ្លាញ់និងកូលេស្តេរ៉ូល ស្តេទីន (Statin)។

៦.ផ្លែមានប្រសិទ្ធភាពជួយបង្កាជំងឺផ្តាសាយ ព្យាបាលជំងឺផ្តាសាយ។

៧. ផ្លែពោតបារាំង មានសព្វគុណប្រើជាថ្នាំបញ្ចុះលាមកប្រភេទស្រាល។

៨. ការទទួលទានផ្លែពោតបារាំងឱ្យបានទៀងទាត់នឹងជួយព្យាបាលជំងឺក្រពះ ភ្នាសក្រពះនិងពោះវៀនរលាក ជួយដល់មុខងារនៃប្រព័ន្ធរំលាយអាហារ ជួយឱ្យបន្ទោរបង់លាមកស្រួល ជួយការពារការទល់លាមកបានយ៉ាងល្អប្រសើរ និងជួយដល់មុខងារនៃប្រព័ន្ធបឺតស្រូបសារធាតុចិញ្ចឹម ជួយគាំពារការរីករាលដាលនៃបាក់តេរីមានប្រយោជន៍ (ប៉្រូបៃអូទិកបែកថេរៀ ) ជួយកាត់បន្ថយហានិភ័យពីជំងឺដំបៅក្រពះ ការពារជំងឺមហារីកក្រពះនិងមហារីកពោះវៀនធំ។

៩. នៅក្នុងផ្លែពោតបារាំងមានសារធាតុដែលជារំអិលពពួកផេកទីន (Pectin) និង ហ្គ័ម (Gum) មានគុណសម្បត្តិជួយស្រោបដំបៅក្នុងក្រពះនិងពោះវៀនបាន ដោយការពារមិនឲ្យដំបៅរីករាលដាលយ៉ាងមានប្រសិទ្ធភាព។ វាមានប្រសិទ្ធភាពដូចការប្រើថ្នាំ ម៉ៃសូប៉្រូតុល (Misoprotol) ហើយក៏ជួយទប់ស្កាត់បាក់តេរីដែលជាបុព្វហេតុចំបងនៃ​ដំបៅក្រពះបានផងដែរ។

១០. រំអិលនៅក្នុងផ្លែពោតបារាំង ជួយស្រោបភ្នាសក្រពះ ធ្វើឱ្យក្រពះមិនរលាក ជួយធ្វើឱ្យអាហាររំលាយនៅក្នុងពោះវៀនបានកាន់តែងាយស្រួល។ ផ្លែពោតបារាំងជួយបំបាត់ការឈឺពោះដោយជំងឺក្រពះ ឬអ្នកជំងឺដែលរលាកភ្នាសក្រពះពោះវៀន។

១១. ជួយព្យាបាលឈឺពោះមួល ដោយប្រើផ្លែចាស់ៗស្រស់ៗយកមកបុកឲ្យម៉ដ្ឋលាយជាមួយទឹកក្តៅផឹក។

១២. ជួយបំបាត់ការច្រាលអាស៊ីត ដោយយកផ្លែពោតបារាំងមកស្ងោរជាមួយទឹកអំបិលរួចផឹក។

១៣. ជួយទម្លាក់ព្រូន (បណ្តាលមកពីការបានទទួលពពួកប៉ារ៉ាស៊ីតនៅក្នុងសាច់ឆៅ មានដូចជា សាច់ជ្រូក សាច់ទា សាច់មាន់ កង្កែប បង្គា សាច់ត្រីជាដើម) ដោយការបរិភោគផ្លែពោតបារាំងជាប់ៗគ្នាយ៉ាងហោចណាស់ ១៥ ថ្ងៃ ប៉ុន្តែសម្រាប់អ្នកខ្លះ ត្រូវបរិភោគរាប់ខែទើបជា។

១៤. ផ្លែពោតបារាំង និងឫស ស្ងោរផឹក ជាថ្នាំព្យាបាលជំងឺស្វាយប្រមេះ។

១៥. ទទួលទានផ្លែពោតបារាំងជាប្រចាំ ជួយបំប៉នថ្លើម។

១៦. ផ្លែពោតបារាំង ឬ Okra ប្រើជាថ្នាំបំប៉នឆ្អឹង បង្កើនរំអិលក្នុងអង្គុញក្បាលជង្គង់ និងបន្ថយការឈឺសន្លាក់។

១៧. រំអិលក្នុងផ្លែពោតបារាំងជួយធ្វើឲ្យស្បែកមានសំណើមមិនបែកស្រកា ដោយយកផ្លែខ្ចីមកបុកបំពោកលើស្បែកពេលរលាកដោយកំដៅថ្ងៃ។