អាហារូបត្ថម្ភនៃផ្លែប៉ោម

ផ្លែប៉ោម ជាផ្លែឈើដ៏ពេញនិយមទាំងនៅក្នុងប្រទេសកម្ពុជានិងនៅលើពិភពលោក ដោយសារតែផ្លែឈើនេះ មានរសជាតិឆ្ងាញ់ និងសម្បូរអាហារូបត្ថម្ភចម្រុះជាច្រើន រួមមាន កាឡូរី កាបូអ៊ីដ្រាត កាកសរសៃ វីតាមីន C ប៉ូតាស្យូម វីតាមីន K  វីតាមីន A, E, B1, B2, និង B6  ។

អត្ថប្រយោជន៍នៃផ្លែប៉ោម

ពង្រឹងសុខភាពបេះដូង

ផ្លែប៉ោមអាចជួយកាត់បន្ថយហានិភ័យជំងឺបេះដូង ព្រោះផ្លែឈើនេះ មានកាកសរសៃ ដែលអាចបញ្ចុះកម្រិតកូលេស្តេរ៉ូលក្នុងឈាមបាន។ ម៉្យាងទៀត ផ្លែប៉ោមក៏មានផ្ទុកសារធាតុ polyphenols ដែលជាសារធាតុប្រឆាំងអុកស៊ីតកម្ម ហើយភាគច្រើនមាននៅក្នុងសំបកផ្លែប៉ោម។ សារធាតុមួយក្នុងចំណោម polyphenol គឺសារធាតុ flavonoid ម្យ៉ាងឈ្មោះepicatechin អាចជួយបញ្ចុះសម្ពាធឈាម។ ការសិក្សាជាច្រើនបានបង្ហាញថាការញ៉ាំសារធាតុ flavonoid ច្រើនអាចកាត់បន្ថយហានិភ័យជំងឺដាច់សរសៃឈាមខួរក្បាល២០%។ សារធាតុ flavonoid នេះក៏អាចជួយការពារជំងឺបេះដូងដោយបញ្ចុះសម្ពាធឈាម បន្ថយខ្លាញ់អាក្រក់ LDL និងដើរតួជាសារធាតុប្រឆាំងអុកស៊ីតកម្ម។

ដោះស្រាយបញ្ហាជំងឺទឹកនោមផ្អែម

ការសិក្សាដ៏ធំមួយបានលើកឡើងថាការញ៉ាំផ្លែប៉ោមមួយផ្លែមួយថ្ងៃអាចកាត់បន្ថយហានិភ័យជំងឺទឹកនោមផ្អែមប្រភេទ២បានរហូតដល់២៨% បើធៀបនឹងអ្នកមិនញ៉ាំផ្លែប៉ោមសោះ។ ទោះបីជាញ៉ាំផ្លែប៉ោមត្រឹមតែមួយទៅពីរផ្លែក្នុងមួយសប្ដាហ៍ក៏មានប្រសិទ្ធភាពដែរ។ នេះអាចមកពីសារធាតុ polyphenol នៅក្នុងផ្លែប៉ោមអាចបង្ការការខូចខាតជាលិកា ឬកោសិកា Beta នៅក្នុងលំពែង។ កោសិកា Beta ផលិតអរម៉ូនអាំងស៊ុយលីនសម្រាប់រាងកាយ និងភាគច្រើនអ្នកមានជំងឺទឹកនោមផ្អែមប្រភេទ២មានការខូចខាតកោសិកា Beta នេះ។

ល្អសម្រាប់សុខភាពពោះវៀន

ផ្លែប៉ោមមានផ្ទុកសារធាតុ pectin ដែលជាជាតិសរសៃមួយប្រភេទ និងដើរតួជា prebiotic។ សារធាតុនេះអាចជួយដល់បាក់តេរីល្អនៅក្នុងពោះវៀន។ ពោះវៀនតូចមិនស្រូបយកជាតិសរសៃអំឡុងពេលរំលាយអាហារទេ។ ដូចនេះជាតិសរសៃនេះនឹងទៅពោះវៀនធំដែលជួយដល់ការលូតលាស់បាក់តេរីល្អ។

ជួយសម្រកទម្ងន់

ផ្លែប៉ោមសំបូរដោយជាតិទឹក និងជាតិសរសៃដែលជួយឲ្យឆាប់ឆ្អែត និងមិនសូវមានអារម្មណ៍ឃ្លាន។ ដូចនេះ លោកអ្នកអាចកាត់បន្ថយការបរិភាពច្រើន ដែលអាចជួយលោកអ្នកក្នុងការសម្រកទំងន់បាន។

ព្យបាលជំងឺហឺត

សារធាតុប្រឆាំងអុកស៊ីតកម្ម នៅក្នុងផ្លែប៉ោម អាចជួយការពារសួតពីការខូចខាតបង្កដោយអាការៈ oxidative stress។ សំបកផ្លែប៉ោមផ្ទុកសារធាតុ flavonoid ឈ្មោះ quercetin អាចជួយដល់ប្រព័ន្ធភាពស៊ាំ និងបន្ថយការរលាកដែលអាចមានផលប៉ះពាល់ដល់ជំងឺហឺត និងអាលែកហ្សី។

ជួយពង្រឹងសុខភាពឆ្អឹង

ការស្រាវជ្រាវមួយរកឃើញថា សារធាតុប្រឆាំងអុកស៊ីតកម្ម និង សារធាតុប្រឆាំងការរលាក ដែលមាននៅក្នុង ផ្លែប៉ោម អាចនឹងជួយបង្កើនកំហាប់ឆ្អឹង និងធ្វើឲ្យឆ្អឹងរឹងមាំ។ ការសិក្សាជាច្រើនបង្ហាញថាផ្លែប៉ោមមានឥទ្ធិពលវិជ្ជមានទៅលើសុខភាពឆ្អឹង។