ម្ជូរល្មមក្រហម ជាតិណជាតិប្រចាំឆ្នាំ មានដើមរឹង មានកំពស់ពី ៥០-១៨០ សង្ទីម៉ែត្រ មានច្រើនពូជ ដើមនិងមែកមានពណ៌ស្វាយលាយក្រហម បន្តពូជដោយប្រើគ្រាប់។ ទាំងដើម ទាំងស្លឹក ផ្កា និងផ្លែ សុទ្ធតែមានប្រយោជន៍យកទៅប្រើប្រាស់ព្យាបាលជំងឺបានយ៉ាងមានប្រសិទ្ធិភាព។

១. ត្របកចិញ្ចឹមផ្កាឬស្រទាប់ទម្រផ្កាហ៊ុំផ្លែ ប្រើជាថ្នាំកាត់បន្ថយជាតិខ្លាញ់ក្នុងឈាមនិងជួយសម្រកទម្ងន់ ដោយមានការសាកល្បងទៅលើសត្វទន្សាយដែលមានខ្លាញ់ច្រើន ហើយបានរកឃើញថាកម្រិតត្រៃគ្លីស៊ឺរ៉ៃដ៍ កូលេស្តេរ៉ុល និងកម្រិតខ្លាញ់អាក្រក់ (LDL) ថយចុះ និងមានបរិមាណខ្លាញ់ប្រភេទល្អ (HDL) កើនឡើង។ លើសនេះទៀត ភាពខ្លាំងក្លានៃការកកស្ទះសរសៃឈាមក្រហមពីបេះដូងក៏ថយចុះជាងក្រុមដែលមិនបានទទួលសារធាតុចំរាញ់ចេញពីផ្លែ គ្រាប់ និងទឹកម្ជូរល្មម។

២. ផ្កាម្ជូរល្មមក្រហម ជួយរំលាយជាតិខ្លាញ់ក្នុងសរសៃឈាម។

៣. ទឹកបានពីស្ងោរត្របកផ្កាម្ជូរល្មម ជួយបំបាត់អាការៈហេវហត់អស់កម្លាំង បន្ថយកម្រិតជាតិស្ករក្នុងឈាម ជួយអ្នកមានជំងឺទឹកនោមផ្អែម ជួយកាត់បន្ថយសម្ពាធឈាម ដោយគ្មានផលប៉ះពាល់សុខភាពណាមួយឡើយ។

៤. គ្រាប់ទុំស្ងួតបុកឆុងទឹកក្តៅផឹក ជួយបំប៉នឈាម ព្យាបាលសរសៃឈាមស្ទះ បំប៉នសរសៃឈាមឲ្យរឹងប៉ឹង ទន់យឺតបានល្អ។

៥. នៅប្រទេសអេហ្ស៊ីប ប្រើដើមទាំងមូលស្ងោរផឹក ជួយជាថ្នាំព្យាបាលជំងឺបេះដូង និងជំងឺសរសៃប្រសាទ។

៦. ទឹកផ្កាម្ជូរល្មម ជួយបំបាត់អាការៈស្ងួតបំពង់កស្រេកទឹក ក្តៅក្នុង បន្ថយសីតុណ្ហភាពក្នុងរាយកាយ ជួយបង្កើនអង្គការពាររាងកាយឲ្យរឹងមាំ ជួយបង្កាផ្តាសាយ ដោយសារផ្លែម្ជូរល្មមមានសារធាតុ អេនតូសៃយ៉ានិន Anthocyanin ដែលជាសារធាតុពណ៌ក្រហមក្នុងក្រុមតែមួយដែលរកឃើញក្នុងផ្លែពពួកប្ល៊ូបើរី ប៉ុន្តែម្ជូរល្មមក្រហមមានសារធាតុប្រភេទនេះច្រើនជាងប្ល៊ូបើរីដល់ទៅ ៥០%។

៧. ទឹកបានពីផ្លែនិងស្លឹកម្ជូរល្មមក្រហម ជួយបំបាត់គ្រុន ក្អក ប្រើជាថ្នាំបណ្តេញស្លេស្ម៍ បញ្ចុះទឹករំអិលលក្នុងបំពង់ក ឲ្យធ្លាក់ទៅតាមទ្វារធំ បំបាត់អាការៈចេញឈាមតាមអញ្ចាញធ្មេញ ដោយសារមានវីតាមីន C ខ្ពស់ ជួយរំលាយអាហារ ប្រើជាថ្នាំបញ្ចុះលាមក ជួយឲ្យមានរំអិលក្នុងពោះវៀន ធ្វើឲ្យលាមកទន់។

៨. ផ្លែម្ជូរល្មម ជួយព្យាបាលជំងឺរលាកក្រពះនិងពោះវៀន ដោយយកផ្លែទុំហាលស្ងួតមកបុកឲ្យម៉ដ្ឋ ប្រើទទួលទាន១ថ្ងៃ ៣ដង ម្តង១ស្លាបព្រាបាយរួចផឹកទឹកតាមក្រោយ។

៩. ម្សៅបានពីគ្រាប់និងផ្កាម្ជូរល្មមកិនម៉ដ្ឋ ឆុងផឹកជួយព្យាបាលជំងឺក្នុងប្រព័ន្ធទឹកនោម ក្រួសក្នុងតម្រងនោម ក្រួសក្នុងក្រលៀន រារាំងមេរោគឆ្លងក្នុងប្រព័ន្ធទឹកនោម កាត់បន្ថយការរលាកក្រពះឈឺក្រហល់ក្រហាយ ដោយ យកម្សៅកិនម៉ដ្ឋនោះទម្ងន់ ៣ក្រាម មកឆុងនឹងទឹកក្តៅ១ពែង ផឹក១ថ្ងៃ ៣ដង រយៈពេល៧ថ្ងៃឬរហូតដល់ជា។ មានរបាយការណ៍ស្រាវជ្រាវរកឃើញថា អ្នកជំងឺដែលផឹកទឹកម្សៅម្ជូរល្មមក្រហម ទម្ងន់៣ក្រាម ឆុងទឹកក្តៅ១កែវ ផឹក១ថ្ងៃ ៣ដង រយៈពេល១ឆ្នាំ ៨០%នៃអ្នកជំងឺ មានទឹកនោមថ្លាជាងមុន ហើយបានរកឃើញថា ទឹកនោមមានអាស៊ីតកាន់តែច្រើន ជាហេតុជួយសម្លាប់មេរោគក្នុងប្រព័ន្ធបង្ហូរនោមបានយ៉ាងប្រសើរ។

១០. ទឹកស្ងោរផ្កាម្ជូរល្មម ជួយការពារជំងឺក្រពេញប្រូស្តាតរីកធំ។

១១. ទឹកស្ងោរគ្រាប់និងផ្កា ជួយបង្កើនលំហូរទឹកប្រមាត់ចេញពីថ្លើម និងជួយការពារថ្លើមមិនឲ្យខូចខាត។

១២. ផ្កាម្ជូរល្មម ជួយព្យាបាលក្រលៀនខ្សោយ។

១៣. គ្រាប់ផ្លែម្ជូរល្មម ជួយព្យាបាលជំងឺខ្សោយទឹកប្រមាត់។

១៤. ទឹកផ្កាម្ជូរល្មម មានឫទ្ធិប្រឆាំងការកើតពិសថ្លើមនិងជួយការពារថ្លើមពីការបំផ្លាញដោយសារធាតុពុល។ មានការស្រាវជ្រាវទៅលើសត្វពិសោធន៍រកឃើញថា សារធាតុពីទឹក អាន់ថូស៊ីយ៉ានីន (Anthocyanins) និងសារធាតុ ប្រូតូកាតេស៊ុយអ៊ីត អាស៊ីត( Protocatechuic Acid ) នៅក្នុងផ្កាម្ជូរល្មមក្រហម អាចជួយកាត់បន្ថយជាតិពុលចំពោះថ្លើមបានជាច្រើនប្រភេទ។